"¿Crisis? ¿Qué crisis?"

Semeya:



Testu:

¿Crisis? ¿Qué crisis?

Por mui asistemáticu y azarosu que sea’l repasu fotográficu añal que venimos faciendo nestes páxines, nun diba poder concebise que nesta sección nun se tratara’l tema de los temes nos últimos meses: la crisis. Y pa ello --mirái qué travesáu y iconoclasta soi-- escueyo una semeya que lo último qu’espeya ye la mentada crisis. Un home quier fundise col suelu, marcar l’autohumillación como moneda de cambéu pa consiguir una llimosna, un xestu de caridá ente los viandantes apresuraos. La so figura ye estática, anclada a la tierra y al momentu; los piatones, d’otra manera, conformen representaciones dinámiques, en movimientu. Pal home que pide, pal probe, nun hai cambéu, nun hai, siguiendo la so etimoloxía, crisis.

La crisis afecta a la realidá dinámica del primer mundu, al suxetu cambiante de los poseedores, anque más que como suxetos habíen ser definíos (habíemos ser definíos) como oxetos porque, a pesar a la nuestra posición de privilexu, nun somos facedores de la nuestra realidá, a lo menos de la nuestra realidá económica, que, como bien nos aprendieron, ye la única realidá real. Un confusu baturizu de ciclos macroeconómicos, un turbiu báramu d’escuros conseyos d’alministración marquen si podemos comprar un pisu o siguir viviendo arrendaos, si podemos comprar xoletes de gochu o de xata, si podemos cambiar de coche o siguir sufriendo la pota qu’heredemos del tíu Ramón. Sí tenemos la capacidá de decidir a cada cuatro años quién va xestionar les migayes sociales que-y queden a los presupuestos del Estáu. Nesi ruin porcentaxe del mundu ye onde viven les ideoloxíes.

Como realidá dinámica que somos, necesitamos un guía, un pastor que nos enverede peles siendes de la vida y esa figura necesaria y tranquilizadora represéntenla los economistes. Pero ¿qué ocurre cuando’l pastor ta enfiláu, cuando dios ta dormiendo, cuando tolos espertos fallen nes sos previsiones?: el cataclismu, la crisis, perdón, LA CRISIS. Siempre sentí dello de complexu d’inferioridá al falar con banqueros (meyor dicho, con bancarios, creo que nunca traté con un banqueru) y economistes. Siempre creí sensatamente y siempre me fixeron creer que la mio opinión nun yera más qu’un patéticu gritu d’un nenu ensin fundamentos. Nun creo qu’eso sea mentira, pero tamién sé que les sos teoríes nun taben mui apotaes, que los sos tiros escasamente dieron na diana. Y eso ha tener una consecuencia, una responsabilidá. Supongo que, si nengún metereólogu fora a predicir la mayor tormenta del sieglu, habría que cambiar de metereólogos. Anque seguro que diba haber quien dixera que lo qu’había que facer yera cambiar de planeta.

Nun sabemos d’economía, nun tenemos nin la más remota idea de cómo funciona l’asuntu. Podemos echar la partida, pero ensin saber les regles del xuegu porque entender lo que ye’l dineru nun nos ye dao. Como mio güelu, que siempre nos facía de rir cola so incapacidá pa midir el valor monetariu de les coses: “Á güilo, ¿cuánto pue valir esta casa?”. “Nun sé, cien mil pesetas”. “N’home non, más”. “Quesió, mil millones”. Esa inocencia ye una de les coses que siempre me prestaron d’él. Pero la inocencia tampoco nun ye sinónimu de fatura o que-y lo pregunten a un amigu d’él de Felechosa. Tiró pa Uviéu a comprar unos zapatos na cai Madalena y, en mercándolos, echó a andar hasta la plaza la catedral. Ellí, unos mozos folgaos quixeron rise d’aquel paletín que traía’l paragües al llombu y interrumpiéronlu mientres contemplaba la monumentalidá del templu: “Señor, menuda maravilla, ¿verdad?”. “La verdá ye que sí”. “¿Cuánto cree usted que puede valer este edificio?”, preguntaron aguantando les risotaes. “Pos pa mi que debe valir lo mismo qu’una aguá en mayo” soltó humildemente filosóficu’l paisanu. La verdá ye que nun tenemos nin puñetera idea d’economía.

Esta semeya d’un mundu ayenu a les crisis, d’un mundu perpetuu tamién nos muestra gráficamente otra realidá: la del tercer mundu como oxetu insertáu nel primer mundu. L’home postráu ye un estorbu pa los piatones, un ente que molesta y fadia. Pue ser hasta que daquién zarapique con él, tropiece col so cuerpu y caya embaxo y los sos güeyos queden a l’altura de los del méndigu y dambos observen el vaciu qu’ostenten los sos respectivos globos oculares. Pue ser que nesi momentu se decidan a socializar les pérdigues y ayudase a ponese en pie. Anque ún de los dos podrá siguir camín alantre y l’otru, yá baxando de nuevo al suelu, namás aceptar la so condena al estatismu.

[Publicao en Les Noticies]

"Hegel de saldu"

Semeya:


Testu:

Hegel de saldu

L’añu divídese en dos estaciones marcaes por dos solsticios: el de les rebaxes de xineru y el de les rebaxes de xunetu. Pierde sentíu la vieya división cuaternaria nuna sociedá alloñao del campu y los sos ciclos. Seguro que dalgún cultivador occidental del h.aiku yá escribió (o escribirá) dalgunos versos --tres, supongo-- sobre la manera en que caen, describiendo un harmónicu vuelu, les antigües y carísimes etiquetes ensin rebaxar sobre’l suave suelu del centru comercial.

Prestaba, de toles maneres, que les rebaxes foran daqué más totalizador, más universal (que foran una forma de vida, un sentimientu que diera pie a pintaes de reivindicación victimista del tipu “Shopping is not a crime”): rebaxes nes multes, rebaxes nos cacharros (nel preciu, non na cantidá de whisky, qu’eso yá existe: un cacharru rebaxáu), rebaxes na nota desixible p’aprobar un exame, rebaxes nos requisitos pa conquistar a la persona amada, rebaxes nel IBI, rebaxes na declaración de la renta, rebaxes nel periódicu del día. Diba ser curativo tener dos momentos purificadores al añu de rebaxa total. Pero va llegar esi momentu. Los Estaos modernos, la Humanidá mesma nun van tar completos hasta que nun algamen esi finxu.

Esti día fui a les rebaxes. Decepción. ¿Baxar dos euros a unos pantalones de cuarenta ye rebaxar? Non, home, non. Lo que tienen nes tiendes ye poca vista, bobu. ¿Nun se dan de cuenta de que lo qu’opera na mente del comprador de rebaxes ye un algoritmu tal que’l valor del productu que se quier mercar ye igual a la diferencia ente lo que costaba y el preciu rebaxáu? Nun da más el preciu inicial, lo qu’importa ye la diferencia. Que s’enteren. Anoxáu, marché de la tienda decidíu a esperar a les segundes rebaxes, la gran redundancia del capitalismu: “rebaxar” pue significar ‘volver a baxar’; si m’apures, “rebaxes” pue referise a ‘les coses mui baxes’, pero ¿cómo llamamos a la mengua de la mengua?: “segundes rebaxes”, rerrebaxes, el descuentu verdá, diéronnos la mano primero y agora tenemos el brazu. A la fin engañemos a El Corte Inglés. Anque (nunca meyor dicho), too tien un preciu: les segundes rebaxes son como la casería d’Escarlata O’Hara --¿por qué Johansson ye Scarlett y O’Hara, Escarlata?--: hai un cartel que pon “TARA” per tolos llaos. Tierra de Tara. Ropa tarao. A dios pongo por testigu que nun voi volver a les rebaxes.

Vemos na semeya a Arsenio, en plenu ritual de pasu propiu del solsticiu de veranu. La paisana ta probando una falda y él quier más esperar onde más pega l’aire condicionao. Saca tola maña que llabró n’años p’autoencontase, pa mantener un equilibriu máxicu basáu en dos columnes maestres: tol pesu del cuerpu descansa nuna doble prolongación de brazos y piernes que conecten cola estructura d’armazón creada nos bolsos de los pantalones de tergal. Piensa que’l traxe del maniquí (“la maniquí”, meyor dicho) someya más a un vistíu de fallera qu’a un productu d’alta costura, pero tovía nun vio la clave, la revelación qu’echa esta semeya: el cartel doble qu’a les sos espaldes nos alluma’l camín: “SÍNTESIS”.

Hegel distingue tres momentos dientro del procesu dialécticu: tesis, antítesis y síntesis (la tríada dialéctica). El primer momentu --tesis-- ye una afirmación, una realidá, un conceptu: “facíame falta comprar ropa”. El segundu momentu --antítesis-- ye la negación o contradicción de lo anterior: “ta mui caro, fía”. El tercer momentu --síntesis-- ye la superación del conflictu y mantién los aspectos positivos de los dos estadios anteriores: “voi dir a les rebaxes”. Trunfa la síntesis y ofreznos, cómo non, un tres por ún: tesis, antítesis y síntesis al preciu de la síntesis. Más barato, imposible. Bien ye verdá que la tríada dialéctica ye un inventu pedagóxicu de los estudiosos de Hegel, qu’él nunca usó esos términos. Ye ropa de marca, pero falsificao. ¿Qué más quies con esi preciu?

Miro otra vuelta pa la semeya y pienso na soledá teatral de los maniquís. Un Esperando a Godot eternu a la busca del so oxetivu últimu: la transustanciación, el milagru; cuando menos, la transacción de la so ropa al cuerpu de los clientes, la desnudez como victoria, miles d’humanos vistiendo nel mundu esterior lo qu’ellos visten como trunfu. Anque, de nueche, el maniquí, la maniquí tea a escures, abandonáu, inútil. Esperando, esperando, esperando.

[Publicao en Les Noticies]

Semeya:

Testu:

Emperador 3D

“Annus horribilis”. Siempre asocio esa espresión con Lady Di (¿o yera con Lady Day?), pero guapamente podía valir pa definir l’últimu añu del Gobiernu asturianu. A lo menos, no que cinca a la rellación colos sos fiyos: los funcionarios. Anulación de la carrera profesional, inhabilitación de les plantiyes docentes, invalidación de dellos procesos selectivos... Toos estos reveses (¿xueguen al tenis los conseyeros?) xudiciales complétense con una engarrada de contino colos sindicatos. Cuando un Gobiernu socialdemócrata anda a la griesca a cada día colos sos funcionarios ye que dalgo falla: o los funcionarios o’l Gobiernu socialdemócrata. Ye verdá que la xente que trabaya pal Estáu ha tener un control que repercuta nuna mayor eficiencia. Ye verdá que delles veces hai xente que fai dexación de funciones (y dígolo yo, que soi un asquerosu funcionariu más), pero tamién ye verdá qu’al amu nun-y pue dar una ventolada y querer reformar la casa ensin contar colos que la habiten. N’últimos cabos, el funcionariáu d’un país marca un límite de máximos pal restu de trabayadores y una mengua nos derechos d’aquellos conviértese nuna mengua de los derechos d’estos. Cuando los funcionarios tengan quince díes de vacaciones, los obreros tendrán una selmana.

Esti día, pasiando per Soto, vi una escena mui evocadora: una paisana entraba dientro del patiu de la escuela (pa ser más exactos, del CRA, que significa Centru de Rendimientu Altu, ¿non?) pa colingar de la valla metálica que la / lu arrodia tres toballes d’HUNOSA (sí, estes azulines rectangulares). Paecióme una bona radiografía d’Asturies. Protección. Oficial. Por razones revesaes que nun vienen al casu, fui a escuela en Morcín. Eso xeneróme un gran complexu d’inferioridá que tovía arrastro, porque en clase yo yera l’únicu (a lo menos, asina lo recuerdo, que ye lo importante) que nun llevaba los llibros na maletuca d’HUNOSA. Eses bolses de tela plastificao col anagrama en blanco de la empresa yeren pa mi la culminación del Estáu del bienestar. Nuna sociedá xusta tol mundu diba tener la so maleta. Yo sentíame un probetayu fiyu de maestrinos. ¿Qué me podíen traer mio padre y mio madre del trabayu? ¿Una tiza? ¿Un borrador? ¿Un mapa mudu? Yo quería esa condenada maleta. Yo quería sentime protexíu.

Tamos equí pa comentar esta semeya de riba, non pa facer terapia de baldre, ¿non? De toles maneres, cuando la veo (la semeya), nun soi a evitar recordar otru trauma de cuando nenu. Más qu’un trauma, un fiascu: les gafes 3D. ¡Cuánta ilusión punximos naquella estrena! ¡Cuántos rebolguinos esperando a que llegara a los Principado o, tamién nos valía, a los Minicines “Pesadilla en Elm Street 3”! Diba ser la nuestra primer esperiencia 3D. Les dos dimensiones nun yera más qu’un estadiu qu’había que superar. Pero la verdá ye que la película víase igual con gafes 3D qu’ensin elles, lo que tuvo un efectu máxicu: por nun aceptar la derrota, tol mundu comentaba les maraviyoses sensaciones que tuviera na sesión, tol mundu recordaba la inigualable dimensión que descubriera. Tol mundu inventaba una película, conque cada espectador vio una obra distinta: la que quería ver. Lo mesmo nesta semeya de políticos y ex-políticos (porque un ex-rector ye un ex-políticu, ¿non?): con cara orgásmica, Vicente Álvarez Areces ve una Asturies moderno y culto, María Jesús Álvarez ve más o menos lo mesmo, l’ex rector Juan Vázquez contempla un heriedu únicu na Universidá d’Uviéu y l’ex-conseyeru Riopedre (la so cartera --perdón, la cartera ye pa los ministros, los conseyeros deben trespasase una mochila, d’HUNOSA, pueque-- n’Educación asumióla va tiempu Ana Rosa Migoya) columbra un sistema educativu de garabatiyu. Caún viendo lo que quier.

A la manera del emperador que diba desnudu contando que diba vistíu y naide-y lo dicía, val más creer que somos razonablemente felices. Anque toos vean lo contrario. Pero la nuestra inconsciencia pue tener consecuencies indeseaes. N’“El Palacio de la Luna”, Paul Auster cuenta cómo Marco Stanley Fogg y el vieyu Thomas Effing ven, a plenu sol, a un mozu abellugase d’una imaxinaria lluvia so un paragües ensin tela. Deciden sigui-y el xuegu y metese baxo esa cadarma metálica y lleven el disparatáu oxetu pa casa como regalu. A los dos díes, el vieyu Effing propónse desafiar el bastiazu que cayía en Nueva York col paragües taráu como defensa. Ye feliz per unes hores creyéndose invencible, innmune al agua... pero garrando una pingadura que-y provoca una pulmonía mortal. Morrió creyendo que yera feliz o, como mínimo, morrió creyendo que taba secu. Cada individuu ha responder al so dilema, a si quier vivir consciente o con gafes 3D. Yo tengo mui claro que nun tengo nin la más mínima idea de qué ye lo meyor. Pa por si acasu, guardo dos paragües nel armariu: ún con tela y otru ensin ello.

"Schrödinger on the TV"

Semeya:
Testu:

Schrödinger on the TV

Mozos y moces faciendo fila na cai San Francisco d’Uviéu. Rapazos y rapaces d’ente diecisiete y venticinco años. Lo primero que se m’ocurre ye que puean tar esperando pa facer dalgún trámite na Universidá, que tien equí’l so nuedu históricu, pero non, nesi casu habíen tar encontaos na parte derecha de la vía, non na esquierda. Pue ser tamién que tean aguardando l’actuación d’un grupu de rock suecu nel salón d’actos de CaxAstur, anque, bien pensao, diben tar mirando pa riba y non pa baxo. Sé que m’avero cada vez más a la solución, yá nun tengo dudes: la confitería y salón de té (grandiosa definición) “Rialto” zarró, quiciabes por culpa de la baxada nes ventes de los moscovites (el dulce, non los habitantes de la capital rusa), y llantaron aende una oficina del INEM. Esto ye Asturies.

Tan contentu taba yo col enfoque que-y diera al empiezu del artículu, tan arguyosu de despachar en tiempu y forma un escritu nuevu, cuando me llama’l fotógrafu que m’apurriera la semeya pa rompeme los esquemes: “Pablo, dígotelo pa por si acasu, pero... tienes claro a quién saqué la foto que te mandé, ¿non? Sabes que ye la fila pal “casting” d’”Operación Triunfo” n’Uviéu, ¿eh, ho?”. “Por supuesto, por supuesto que lo sabía, nin”. Pueo defendeme diciendo que nun hai tanta diferencia ente uno y otro, que la mecigaya d’esperanza y decepción inminente ye asomeyada, pero, pa ser honestu, si miro con más procuru la semeya, reconozo volao’l mio error: esta imaxe destila per tolos llaos una mística “warholiana”, una busca d’esos quince minutos de gloria a los que tien derechu hasta’l más miserable de los humanos. Como diz, muncho meyor que yo, Pablo Moro, na so memorable “Imitadores de Elvis”: “Quince minutos para dejar huella / como en un casting de telebasura. / Vidas fugaces manchadas de polvo de estrellas. / Vidas urgentes de adolescentes que miran la luna”.

Estos rapacetos tán ehí reclamando’l so cachu na democracia mediática, el so derechu a participar nel sistema. Nun se conformen col procedimientu electoral actual, que limita la participación ciudadana a la posibilidá de mandar un SMS cada selmana, y fáenlo con naturalidá, ensin poses. Pa los escoyíos, esta va ser la última vez qu’actúen asina porque, en cuantes qu’entren na Academia, van pasar a ser personaxes. Y ehí reside la mayor falacia de los “realities”: vendenos que lo que vemos ye real. Erwin Schrödinger, físicu austriacu, ye perconocíu pol so gatu, que yera bien guapu y obediente y que lu ayudó nel so famosu esperimentu: una caxa zarrada y opaca tien un gatu dientro (sí, el gatu de Schrödinger), una botella de gas venenoso, una partícula radiactiva con un 50 % de probabilidaes de desintegrase nun tiempu dau y un dispositivu tal que, si la partícula se desintegra, la botella ruempe y el gatu muerre. El casu ye que, mientres que nun abramos la caxa, el gatu ta tan vivu como muertu o, dicho d’otra manera, nun ta nin vivu nin muertu. Nun sean ustedes malpensaos, nun quiero dicir con esto que los gatos-concursantes que tán dientro de la caxa (tonta) tán tan vivos como muertos. Non. Lo que m’interesa ye la teoría qu’esplica l’esperimentu: el principiu d’incertidume, según el cual, la propia observación de la realidá modifícala (el golifar si’l gatu ta vivu o muertu cambia’l sistema y ye uno o otro dependiendo de la nuestra acción). En resume, la vida de los “triunfitos” na Academia ta absolutamente mediatizada pol fechu de que ta siendo retresmitida (observada) en directo les venticuatro hores. Son gatinos actuando pa un científicu cruel.

L’aspiración última d’OT ye crear bonos cantantes d’orquesta (más duru ye tovía Pablo Moro nel so brillante estribillu: “Está bastante bien / te ves muy sexy / te proponemos para ser / segundo en un concurso de / imitadores de Elvis”) y eso nun hai que lo olvidar. Por eso nun ye pertinente la crítica artística, melómana al programa. Lo que se pide a los nuestros gatinos ye que se muevan en condiciones, que sean curiosos, que miren a la cámara que-yos correspuende, que tomen tol escenariu al baillar... por eso ta fuera de sitiu echar pela so falta de creatividá, de cultura musical o de talentu. Arte y OT son, como diría’l tamién austriacu Wittgenstein, xuegos de llinguaxe distintos. Nun tien sentíu, polo tanto, comparalos y midilos colos mesmos parámetros.

El fenómenu mediáticu d’esti añu fo, probablemente, la figura de Susan Boyle, esa paisanona de cuarentaysiete años, parada, virxe, malcuriosa, mal vistida y espelurciadona qu’asombró al xuráu de “Britain’s Got Talent” (l’OT británicu) cola so impresionante interpretación del tema de “Los Miserables” “I dreamed a dream”. La so escelencia vocal maraviyó al mundu (más de cien millones de persones inxirieron el pildorazu “youtube” de la so actuación), qu’entonó un emotivu “anque seas fea y gorda, querémoste”. Nun tiempu de decadencia, nel mundu occidental, del sentimientu relixosu clásicu, apaecen nicios d’una nueva creencia. Nos platós de televisión (los garantes de la democracia) ta naciendo’l --podíemos llamalo asina-- postcristianismu: caridá pa con Susan Boyle, arrogancia, vía móvil, colos miembros de l’Academia, perdón pa Luis Roldán. Póngome de rodiyes. Prendo la televisión. Rezo.

[Publicao en Les Noticies]

Un añu en semeyes

Retomo la sección "Un añu en semeyes" en Les Noticies.

Esta ye la primer semeya





y esti'l primer testu:

La estética del sufrimientu

Vamos imaxinar que-y enseñamos esta semeya a un estraterrestre que-y dio por dar una vueltuca per La Tierra tres del pigarcín de depués de comer (meyor dicimos d’“inxerir” alimentos”, que ye más aséptico) o, tamién pue ser, a un xostrón qu’acaba de quedar amnésicu por culpa d’una cutilada na frente. Vamos imaxinar que-yos pidimos qu’acierten de qué trata la foto en cuestión. Podíen dicir que los personaxes que la habiten tán contemplando la execución de los sos familiares o la quema del so pueblu o que son víctimes inminentes de dalgún tipu d’holocaustu. N’últimos cabos, daqué apocalíptico y horrible. La mio mollera nun llega a imaxinar qué cara diben poner cuando supieran que lo que tán viendo en papel son espectadores del mayor xenerador d’ociu del mundu occidental, del espectáculu global de la contemporaneidá pol que diben ser capaces a pagar bona parte del so xornal, viaxar un día enteru o faltar al trabayu ensin xustificación. Sí, esos seres humanos tán disfrutando, tán gozándola al máximo.

El nuestru amigu verde y antropomorfu (porque los estraterrestres son asina, ¿non?) o’l rapazón desmemoriáu tienen, entós, motivos abondos pa pensar que los humanos son (somos, pel momentu nun fui abducíu y convertíu) sadomasoquistes. ¿Y qué ye, que nun tienen razón?, ¿eh, ho? En verdá nun nos aterra’l dolor, sinón les sos consecuencies. El dolor ye síntoma de dalgo, pero, si eliminamos lo que lu produz, el síntoma desapaez y el nuestru terror tamién. Por eso disfrutamos coles películes de mieu o lloramos con un poema de Cernuda. Porque esi dolor (esi dolor real) nun tien consecuencies reales, sinón ficticies. Lo mesmo col fútbol: nun aceptar que ye un xuegu ye de llocos, pero nun implicate nél como si fora real invalida’l propiu xuegu. Ensin sufrir, ensin dolor nun hai xuegu. Reconozo que, de nenu, prestábame mordéme’l brazu --suavino a lo primero, más fuerte depués-- o furar con un palín nes xenxives o dexar la xaceda d’una moneda en pechu. Ínfimos dolores controlaos por un ínfimu dios. Sufrimientos ensin consecuencies.

Los sufridores d’esta semeya, amás, tienen un final feliz. Como yá viemos la película, sabemos qu’en xunu del 2008 la selección española de fútbol consiguió’l mayor trunfu de la so historia recién: ganar la Eurocopa. Poca cosa ye la entrada na OTAN, la entrada na Unión Europea o la ¿entrada? nel G 20 comparao cola entrada del tiru de Fernando Torres na rede del tornador alemán Jens Lehmann. Nesi momentu, un segundu depués de que l’osixenáu delanteru esguilara pente los defenses teutones Christoph Metzelder y Per Mertesacker, España entró de verdá na modernidá, pasó a ser daquién en mundu. A quién-y importa d’entós a esta parte la sólida economía d’Alemaña o les bonances del so sistema educativu o lo mal que lo pasó ellí nuestru tíu Ramón. “Nun ves que los ganemos, bobu”. Ta esplicada tamién la tranquilidá cola que’l pueblu español asumió los devaneos orxásticos de Silvio Berlusconi: “¿qué se pue esperar del presidente teniendo una selección de mataos?”.

Mio tíu Milucho, matemáticu, escritor y cérrime del Celta de Vigo, siempre diz que les persones que más pena-y dan en mundu son les que, de la que s’allega a Balaídos, caminen en dirección contraria al estadiu. Camienta que ye absolutamente imposible que sean felices si nun tán les dos hores siguientes viendo (perder normalmente) al so equipu. Pa mi que lo que cautiva del fútbol, del deporte, ye la observancia de la ficción en tiempu real, la creación instantánea d’un mundu non evaluable colos parámetros de la realidá, pero que ye a provocar sentimientos que son interpretaos como reales. Una mentira, pueque. Dulce les menos de les veces y dolorosa les más.

Gústame munchísimo escribir. Guapamente podía ser la cosa que más me presta en mundu, colo que más realizáu (horrorosa espresión) me siento, pero, llector, nun quiero engañalu, agora mesmo toi contando les palabres que me falten p’acabar esti artículu, allampando porque sean poques y quería más, nun lo dude, tar echáu en cama lleendo o tomando unos culinos nuna tarraza o viendo un partíu de fútbol pela televisión. Porque sufro al escribir, porque provoca dolor facelo. Eso sí, un dolor ensin consecuencies. Y agora que me doi de cuenta, les tecles del ordenador tán dexándome una marquina nos deos, una levísima encetadura colorada. Como aquella buelga de dientes que me marcaba’l brazu de nenu.