Hiperreflexividá nel “reality”
La historia de Paca y Tola empecipió siendo un culebrón o una novela sentimental o un folletín por entregues: dos hermanes de tan solo cinco meses queden güérfanes depués de qu’un pérfidu cazador furtivu matara a la madre (de Paca y Tola, que, anque yera mui malísimu, de parricida nun tenía nada) y entréguenles a una institución caritativa (el FAPAS) pa que les críe y-yos dea l’amor que’l villanu arrampuñó. Eso ye l’empiezu d’un viaxe iniciáticu per dellos centros de Cataluña, pasando per El Hosquillo, en Cuenca, onde quiciás se namoraron del mesmu mozu, preconizando’l futuru que-yos aguardaba. A los ocho años, nel 1996, acaben la emigración forzosa y son acoyíes nel centru de Santu Adrianu.
Y equí entra (nunca peor dicho), por fin, Furaco, el fogosísimu osu trayíu dende Cabárceno (cuántos osos asturianos reburdiaríen encontaos en chigre “¿qué ye, que’l mio esperma nun val, ho?”) pa volve-yos l’amor que la vida-yos quitó y, de pasu, pa crear esbardinos y, por qué non, un llar en común. Nesti puntu, too tiraba a que la historia de Paca y Tola (y Furaco) se convirtiera nuna réplica cantábrica de la casposa serie “Escenas de matrimonio”: Paca protestando porque a Furaco nun se-y llevanta, Furaco recordándo-y a Tola lo gorda que ta, Paca diciéndo-y a Tola que l’otru-y pon los cuernos, Furaco pidiendo más cerveza mientres ve un partíu de fútbol na tele...
Pero nesti cálculu nun se tenía en cuenta la posmodernidá y a la posmodernidá nunca hai que lo olvidar. La historia de Paca y Tola no que se convirtió, a lo último, ye nun “reality show”, nun Gran Hermanu plantígradu y l’escuclar en directo la vida ayena y el decantase por una o otra persona / osa / personaxe definieron la convivencia de los tres animales. Claro que pa qu’un “reality” sea un “reality” pide dos coses más: una páxina web y la posibilidá de votar. Y hailo. Pacaytola.com fai una presentación fascinante de los tres miembros de la casa y diznos que Paca nun apara quieta, échase al monte con muncha frecuencia y nun-y gusten muncho les visites nin los fisgonos; ye mui independiente y inquieta. Tola ye práctica y casera, nun se complica la vida. Ye curiosa y metódica y nunca-y caen embaxo les feches importantes. Pela so parte, Furaco ye un profesional; nun tien mieu de los competidores más grandes y esperimentaos y, si se trata de cubrir, “al estilo del torito de El Fary” (sic), nun espera. Na so tierra de Cabárceno yera alimentáu con sobaos y anchoes. Depués de la presentación, l’internauta pue votar por Paca o por Tola, apostando pola que va quedar preñada. Puru “reality”.
El casu ye que la vida, l’amor, el futuru nun se puen planificar y les dos probes acabaron ensin ser fecundaes y Furaco coló pa casa ensin demostrar la sonadía que lu precedía. La causa pa mi ta clara: la hiperreflexividá, que ye la paralís que se produz cuando se pon demasiada atención a la propia conducta, cuando tolos focos tán apuntando a cómo actúes. Ye, como diz tan guapo’l sicólogu Marino Pérez, “un estancamientu sobre ún mesmu qu’impide siguir el ríu de la vida”, una conducta que se vuelve oxetu de preocupación y pasa a un primer planu, dexando como secundario’l restu de la vida del individuu.
Yo, sicólogu de caleya, diagnostico que la hiperreflexividá mató la descendencia de les nuestres heroínes. Una historia posmoderna merecía una resolución posmoderna. Una historia social merecía una resolución social. Una historia colectiva merecía una resolución colectiva porque los nuestros güeyos, los nuestros flaxes, les nuestres visites, el nuestru “reality” foron demasiao pa ellos. Agora, mientres Paca y Tola descansen sobre l’herba, tócanos ponenos guapos. Tamos n’antena.
