martes, 10 de junio de 2008

El viaxe d'Esther Fonseca



Esti vienres a les ocho, nel Filarmónica, va merecer la pena contemplar el viaxe d'Esther Fonseca.


Más info:

La cantante Esther Fonseca apaez nel añu 2002 nel panorama musical asturianu con un discu, Agua, que supunxo una propuesta orixinal y nueva na nuestra tierra: l'averamientu al mundu de la balada céltica y les nueves músiques. Nun yera ésta la primer esperiencia musical nin discográfica d'esta cantante moza. Lloñe quedaben los sos años de neña como integrante de los conocíos grupos de música pa neños "Seliquín" y "Xentiquina", asina como la so participación como voz solista nel discu Xaranzaina, grabáu n'andecha con un garapiellu de músicos mozos del Conservatoriu del Nalón.

El nuevu trabayu d´Esther Fonseca, Viaxe , qu´acaba de ver la lluz, algama un saltu cualitativu mui importante na so carrera musical, y ye un nuevu camín qu'axuntar a los yá abiertos n'Asturies, nel tarrén de les nueves propuestes musicales en llingua asturiana.

El conciertu que s'ufierta ye precisamente un viaxe d'una hora llarga de duración, que percuerre los catorce temes d'esti últimu trabayu , xunto con dalgún tema d'otros trabayos anteriores de la cantante.

Los músicos qu'acompañen a Esther Fonseca nesti conciertu son:

Peter Bulla violín

Javi Monge guitarres

Yago Prado harpa céltica y guitarra acústica

Manu Fonseca flautes

Juanjo González percusiones

Emilio Huerta teclaos

No hay comentarios: