Un añu más

Y yá voi pa vieyu, mante...

Otros tres tristes tigres en Turón

Voces y acentos

Mañana, sábadu día 20, a les 16:30, participo en Xixón en "Voces y acentos", dientro de l'Arribada. Va ser un repasu a la mio obra poética, una especie de recital-versión-estendida.

Recital-presentación en Xixón

Esti sábadu, 30 d'agostu, a les 19:30, nel Salón del Llibru Asturianu (Xixón) recital d'Aurora García Rivas, José Luis Rendueles y Pablo Texón, que va ser, en verdá, una presentación triple de los poemarios Trinquilintainas, Ferruñu y La culpa y la lluz.

Entrevista en PIECES

Esti ye'l vídeo de la entrevista de PIECES.

Más Pieces 2.0

Al final, hubo un reaxuste nel primer programa de Pieces 2.0 y la mio entrevista apaez el día 14. Eso sí, otra vez mui bien acompañáu: Scott Walker y Manta Ray.

Pieces 2.0

Esti sábadu estrénase na TPA la segunda temporada de Pieces, con formatu y conteníos nuevos. Nesta primer entrega Ana Vanessa Gutiérrez faime una entrevista centrada esclusivamente en La culpa y la lluz. Pero lo meyor ye que depués d'esto van echar un reportaxe sobre Joy Division; y eso... sí merez la pena.

Podéis velo pela tele o na web de la TPA.

Roger Waters en Granada

Nel branu del 1993 fui como tolos años d'aquel tiempu a casa de los mios primos en Vilagarcía de Arousa. Y como tolos años d'aquel tiempu rebuscaba llibros y discos nes estanteríes d'Inma y Manuel Ángel (que ye, por cierto, l'actor qu'encarnaba al padre Miguel na serie Aquí no hay quien viva). Esi branu del 93 grabé nuna cinta'l Dark side of the moon, de Pink Floyd. Recuerdo les hores qu'echaba diseñando les portaes de los cassettes y recuerdo que nel llombu, como casualmente'l discu cumplía venti años, punxi en medio "1973-1993".

El casu ye que, a estes hores, Roger Waters yá debió acabar el so conciertu n'Atarfe (Granada), onde revisitó integro la cara escura de la lluna.

Pink Floyd ye de los pocos grupos que sobrevivieron a tolos mios cambios de gustos musicales, que s'instalaron como un telón de fondu inalterable a les "modes personales". Pink Floyd va años que dexaron de ser cool y reivindicables dende'l pensamientu únicu de la modernez musical, pero naide pue negar que dexaron una mano de discos memorables.

Por too esto, nun sé si nun tar esta nueche n'Artafe ye una suerte o non. Tocar el mitu pue ser grande, pero que dexe de selo precisamente por ello pue ser peor que la distancia.

Resulta obligao recordar agora un clásicu del frikismu mundial: la presunta sincronización del discu y la película TheWizard of Oz. Si queréis ver una llista de coincidencies, calcái equí.

Primer parte de The dark side of the rainbow, montaxe fechu cola música de Dark side of the moon y les imáxenes de la peli:

Pasáu y futuru

Abrimos esta casa con una mirada al futuru. Yá ta confirmao: tengo la plaza definitiva de profesor de Lengua castellana y literatura en Morea. Los próximos años van aguantame per Ayer, onde yá ye oficial la toponimia tradicional. Y, como bonos ciudadanos que somos, habrá que respetar les lleis, ¿non?